Монголоор хөөрөлдье #9: Монголд 26 жил амьдарсан япон бүсгүй Чика адуу маллан амьдарч байна

Монгол Улсад 26 жилийн турш тасралтгүй суурьшин амьдарч, нүүдэлчин ахуй соёлтой хувь заяагаа холбосон Япон бүсгүй Чикатайгийн ерөөлтэй бөгөөд сонирхолтой түүхийг "Монголоор хөөрөлдье" нэвтрүүлэг энэ удаагийн дугаартаа онцлон хүргэж байна.

Арлын Японоос эх газрын Монголыг зорин ирсэн түүний амьдралын замнал нь зөвхөн нэг улсаас нөгөөд шилжин суурьшсан хэрэг биш, харин өөрийн дотоод сэтгэлийн дуудлагаа олж, жинхэнэ эх нутгаа нээсэн гайхалтай аялал юм.

Чика өдгөө хөдөө талд адуу маллан, эгэл жирийн малчин бүсгүйн хувиар амьдарч байгаа нь үзэгчдийн анхаарлыг эрхгүй татдаг. Тэрээр орчин үеийн хотын соёл иргэншил, тав тухтай амьдралаас татгалзаж, байгаль дэлхийтэйгээ ойр, нүүдэлчин түмний уламжлалт хэв маягийг сонгосон нэгэн. 

Өглөө эртлэн босож малаа бэлчээх, адуу малтайгаа ойр байх нь түүний хувьд хамгийн том аз жаргал бөгөөд монгол ахуйн гүн гүнзгий утга учрыг өөрийн биеэр мэдэрч, өвлөн тээж яваа нь бахархууштай. Тэрээр өөрийн энэхүү сонирхолтой түүхээ хилийн чанадад суугаа элэг нэгтнүүдтэйгээ хуваалцаж, Чикаго хотын монголчуудтай уулзах үеэрээ тэдний эх орноо гэсэн халуун сэтгэлийг өндрөөр үнэлсэн юм.

Чикагогийн монголчууд харь нутагт ажиллаж, амьдарч байгаа ч үндэсний өв соёл, хэл бичгээ үр хойчдоо өвлүүлэн үлдээхийн төлөө хэрхэн хичээж буйг хараад сэтгэл нь ихэд хөдөлсөн тухайгаа ярьсан юм.

"Монгол хүн хаана ч байсан монгол сэтгэлгээгээ гээхгүй байх нь хамгийн чухал" хэмээн онцолж, билнийг нүүдэлчин өв соёлоороо бахархах ёстойг сануулж байлаа. 

Түүний хувьд Монгол Улс зөвхөн түр зуур оршин суух газар төдий бус, түүний амьдралын салшгүй хэсэг, сэтгэл зүрхнийх нь эх нутаг болжээ. Чика монгол хэлийг гарамгай эзэмшээд зогсохгүй, монгол хүний сэтгэлгээ, зан заншил, ёс уламжлалыг бүрэн өөриймшүүлж чадсан байна. Нэвтрүүлгийн явцад тэрээр өөрийн туулсан хүнд хэцүү болон баярт мөчүүдээ илэн далангүй хуваалцаж, харь орны иргэн хэрхэн монгол хүн шиг сэтгэж, амьдарч болдгийг харуулсан юм.

"Монголоор хөөрөлдье" ярилцлагын энэхүү дугаараас та Чикагийн амьдралын гүн ухаан, монгол соёлд дурласан чин сэтгэл болон түүний сонирхолтой яриаг хүлээн авч үзэх боломжтой.

Хүний сэтгэл хаана байна, тэнд эх нутаг нь байдаг гэдгийг батлан харуулж буй түүний түүх танд нэгийг бодогдуулж, хоёрыг тунгаах боломжийг олгох нь дамжиггүй.