О.Баасанхүү: Цагдаа нар нь өөрсдөө зохион байгуулалттай бүлэглэл үүсгээд, гэмт хэрэг үйлдээд байж болох юм уу?

[su_quote]Өмгөөлөгч О.Баасанхүү "цагдаа нар зохион байгуулалттай гэмт хэргийн бүлэглэл үүсгэн гэмт хэрэгтэнг дахин гэмт хэрэг үйлдэх нөхцөлийг үүсгэж, хил давах боломж олгож байгаа" талаар онцолсон. Уг асуудлаар нь бид тодрууллаа. [/su_quote]

-Би саяхан хуульзүйн туслалцаа үзүүлэх гэрээ байгуулсан. Цагдаагийнхныг хар тамхины ард байна, хүн худалдах гэмт хэргийн ард байна гэж ярьдаг. Би нүдээрээ хараад шоконд орсон.

Жишээлбэл, Баянхонгор аймагт барилга барьдаг нэг этгээд 2023 онд Сүхбаатар дүүргийн шүүх дээр залилангийн гэт хэргээр шүүлгэсэн. Гэтэл урьдчилсан хэлэлцүүлгээр хэргийг нь буцаасан.  Хэрэг нь ХУД дээр очоод 2024 онд шүүхээр орсон, дахиад буцаасан. Буцаасан бол хилийн хориг тавигдана. Гэтэл хилийн хоригтой хүнийг Эрүүгийн цагдаагийн албаны онц хүнд гэмт хэрэгтэй тэмцэх тасгийн ахлах мөрдөгч, тэр цагдаа нь 2015 оны шилдэг цагдаа болсон хүн бүлэглээд гадаадын хөрөнгө оруулагчийг залилуулаад, хилийн хоригтой хүний хоригийг нь үл хэрэгсэн хил давуулан зугтаалгасан байна. Бид хэнд итгэх юм бэ?

Монгол Улсын Ерөнхийлөгч “хүн засаглахгүй, хуль засаглана” гэж хэлсэн. ЦЕГ-ын дарга Т.Сүхбодлыг Эрүүгийн цагдаагийн тасгийн даргаар ажиллаж байхад удирдлагад нь ажиллаж байсан хүмүүс шүү дээ. Ямар ч үр дүн, үр дагавар байхгүй.

Яаж хилээр гаргасан юм гэдгийг шалгаж, тогтоох ёстой.

УИХ-д байхдаа би хүнийг гэм буруугүй байхад нь 461-т хориод яах юм. Шүүхээр хорь эсвэл чип зүүлгээд гадуур шалга гэж ярьж байсан. Өнөөдөр юу ч өөрчлөгдөөгүй байна. 461-р хорих ангид хорих ганц л шалтгаан бий. Дахин гэмт хэрэг үйлдүүлэхгүй гэж. Гэтэл дахин гэмт хэрэг үйлдэх нөхцөлийг цагдаагийн байгууллага өөрсдөө бүрдүүлж байна. Энэ талаар өмнө нь Цахиур.мн сайтад ч гарсан, “Цэнхэр үст” Цэрэн ч байнга ярьж байна. Цагдаагийн байгууллагадаа бид итгэмээр байна. Цагдаагийн байгууллага гэмт хэрэг үйлддэг байгууллага юм уу, түүнээс урьдчилан сэргийлдэг байгууллага юм уу?

Хамгийн аймшигтай нь Эрүүгийн цагдаа нар нь гэмт хэрэг хийсэн байна шүү дээ. Хохирол нь 25 тэрбум төгрөг.

Х.Нямбаатар ХЗДХ-ийн сайд байхдаа гадны хөрөнгө оруулагчийг хохироож, дээрэмдэхгүй гэж ярьсан. Гэтэл ажил хэрэг болоогүй. Ийм пи араар ажил хийдэг байж болохгүй. Энэ хэрэгт 5-6 хүн татсан гэх боловч 10 гаруй хүн оролцсон гэх мэдээлэл надад бий. Яг тодорхой шалгахгүй байна шүү дээ.  Тиймээс УЕПГ-т би хандаж томоохон ажлын хэсэг байгуулаад ажиллах цаг болсон гэж үзэж байна.