Өнөөдөр /2022.10.13/-нд “Өргөө амаржих газар”-ын удирдлага Ж.Энхцэцэг, эмч, эмнэлгийн ажилтнуудад ажлын байрны дарамт үзүүлж олноор нь ажлаас чөлөөлж байгаа асуудлыг МҮЭ-ийн холбоо, МЭМА-ны ҮЭ-ийн холбооноос хөндөж Монгол Улсын Ерөнхий сайд Л.Оюун-Эрдэнэд “Шаардлага” хүргүүллээ.
МҮЭ-ийн холбооны ЕНБД Х.Буяжаргал:
“Өргөө амаржих газар”-ын төрөлжсөн мэргэшлийн эмнэлэгт ажиллаж байгаа олон эмч, ажилтнууд ажлын байрны дарамтад өртөж байгаагийн улмаас ажиллах сонирхолгүй болж, ажлаасаа олноор гарч байгаа нь тэдний хөдөлмөрлөх эрх зөрчигдөж байна. Бид тус байгууллагын удирдлага Ж.Энхцэцэгийн ёс зүй, харьцаа хандлагын талаар ЭМЯ-ны ёс зүйн Хяналтын хорооны 2022.09.09-ний өдрийн 22/75 албан тоот, ЭМЯ-ны “Хяналт-шинжилгээ, үнэлгээ, дотоод аудитын газар”-ын 2022.08.11-ний өдрийн 8/3620 тоот хяналт шалгалтын дүгнэлтийг Эрүүл мэндийн сайдад танилцуулсан.
Гэтэл Эрүүл мэндийн сайд С.Энхболд хяналт шалгалтын дүгнэлтийн дагуу өнөөдрийг хүртэлх хугацаанд Ж.Энхцэцэгт хариуцлага тооцоогүй. Иймд Эрүүл мэндийн Сайд С.Энхболдыг ажлаас нь чөлөөлж холбогдох арга хэмжээг авч өгөхийг Засгийн Газрын тэргүүн Ерөнхий сайд Л.Оюун-Эрдэнээс шаардаж байна” гэлээ.
“Ковид-19 цар тахлын хүнд цаг үед эмч, эмнэлгийн байгууллагын ажилтнуудыг ажлаас нь олноор чөлөөлж байгаа нь ноцтой асуудал дагуулаад байна. Сувилагч, тусгай мэргэжилтнүүдийн ажлын ачаалал маш их нэмэгдэж 24/24 цагаар ажиллаж байгаа. Эмч ажилтнуудын хөдөлмөрийн хүрээний эрхүүд хууль, дүрэм журам ноцтой зөрчигдсөөр байгаа. Өнөөдөр эмч, ажилтнуудын хөдөлмөрийн үнэлэмж маш доогуур, ажлын байрны дарамт, ялгаварлан гадуурхалтаас үүдэлтэй ажлаас халшрах хам шинж илэрч, ажлын байраа орхиж байгаагаас эрүүл мэндийн салбар хүний нөөцийн хомсдолд орж байна.
Үүнээс үүдэн эрдэнэт хүний амьд явах эрх зөрчигдөж, иргэд олноор эрүүл мэндээрээ хохирч, цаашлаад үндэсний аюулгүй байдлын түвшинд яригдах асуудал үүсэхээр нөхцөл байдалтай байна. Иймд Эрүүл мэндийн салбарын 58 мянга гаруй ажилтнуудын хөдөлмөрлөх эрхэд шууд ба шууд бусаар нөлөөлөх энэхүү удирдлагын ёс зүй, харьцаа хандлагатай холбоотой эмч, ажилтнуудаас гаргасан өргөдөл гомдлыг шийдвэрлүүлэхийн тулд Монголын Үйлдвэрчний Эвлэлийн Холбоо болон Монголын эрүүл мэндийн ажилтны ҮЭ-ийн холбооны гишүүд, идэвхтэн сонгуультан, эмч, сувилагч, ажилтнуудыг төлөөлж Монгол улсын Ерөнхий Сайд Л.Оюун-Эрдэнэд “Шаардлага” хүргүүлж байна. Бидний шаардлагыг хэрэгжүүлээгүй тохиолдолд хуулийн хүрээнд тэмцлийн дараагийн шатанд шилжихээ албан ёсоор мэдэгдэж байна” гэж хэллээ.
“Эрүүл мэндийн сайдын эрхлэх хүрээнд Өргөө амаржих газар төрөлжсөн мэргэшлийн эмнэлэг харьяалагддаг. 2021-2022 оны хооронд тус байгууллагад ажилладаг 487 хүний 138 нь ажлаасаа гарсан. Үүний 82 нь ажлын байрны дарамтаас болоод өөрийн хүсэлтээр өргөдлөө өгөөд ажлаас гарсан байна. Өргөө амаржих газар төрөлжсөн мэргэшлийн эмнэлгийн даргыг Эрүүл мэндийн яамны дэргэдэх Эмнэлгийн мэргэжилтний Ёс зүйн хяналтын хороо нь хянаж шалгаад “Төрийн захиргааны болон албан хаагчийн ёс зүйн дүрэм батлах тухай” Засгийн газрын 2019 оны 33 дугаар тогтоолын 6 заалт, Эрүүл мэндийн сайдын 2019 оны А/406 тушаал “Эмнэлгийн мэргэжилтний ёс зүйн дүрэм”-ийн 6 заалтыг тус тус зөрчсөн.
Хяналт- шинжилгээ, үнэлгээ, дотоод аудитаас 2022 оны 08 дугаар сарын 11-ний өдөр 8/3620 тоот дүгнэлтээ гаргасан. Эмнэлгийн дарга ажил олгогчийн хориглох Хөдөлмөрийн тухай хуулийн 11 дүгээр зүйлд заасныг зөрчин ҮЭ-ийн үйл ажиллагаанд хөндлөнгөөс нөлөөлөх, оролцох, эвлэлдэн нэгдэж үзэл бодлоо илэрхийлсний төлөө хавчих оролдлого удаа дараалан хийсэн ба үүний нэг тод жишээ нь Хамтын гэрээ дуусгавар болсон тул шинээр байгуулах саналаа өгөөд байхад хууль ёсны ҮЭ-ийн хороо биш гээд хамтын гэрээ байгуулах хэлэлцээг эхлүүлээгүй байгаа. Эмнэлгийн даргын хууль бус үйлдлүүд нь удаа дараа нотлогдоод олон арван ҮЭ-ийн гишүүдийн хөдөлмөрлөх эрхийг зөрчөөд байхад арга хэмжээ авахгүй байгаа нь Эрүүл мэндийн тухай хууль болон Засгийн газрын тухай хуулиудад заасан эрх мэдлээ Эрүүл мэндийн сайд хэрэгжүүлж ажлаа хийж чадахгүй байна гэж ҮЭ-ийн байгууллагаас үзэж байна” хэмээн хэллээ.
