Уг эмүүдээс заримыг нь Дэлхийн Эрүүл мэндийн байгууллагаас зах зээлээс татаж эхэллээ. Гэтэл Монголын төр хуурамч эмийг бүр бодлогоор дэмжиж, иргэдээ хорлосоор иржээ.
Германы “Denkpharma”-ийн эмүүдийг манайд Германд үйлдвэрлэсэн, Герман чанар гэж сурталчилаад маш өндөр үнэтэй зардаг. Бүр манай улсын Эрүүл мэндийн даатгалын сангийн хөнгөлөлттэй үнээр олгох зайлшгүй шаардлагатай эмийн жагсаалтад оруулж, нөгөө өндөр үнийнх нь тодорхой хувийг ЭМ-ийн даатгалаас хөнгөлдөг. Гэтэл “Денк”-ийн эмүүд нь Германы эмийн улсын бүртгэлд байдаггүй, Германдаа нэг ч эмийн санд зарагддаггүй. Энэтхэг, Хятадад үйлдвэрлэж, Германд зөвхөн савлаад “Герман чанар” нэрээр Монголд зардаг болохыг энэ салбарынхан олон жил хэлж ярьсаар ирсэн. Манай төр иргэдээ бодох биш. Монголд бүр төлөөлөгчийн газар нээчихсэн. Гэтэл эдгээр эмүүдэд хорт бодисын хэмжээ зөвшөөрөгдөх хэмжээнээс хэтэрсэн нь тогтоогдсон тул Дэлхийн эрүүл мэндийн байгууллага зах зээлээс эргүүлэн татах болсон байна. Хамгийн ноцтой нь бүр хүүхдэд зориулсан эмийн нь хольцын хэмжээ зөвшөөрөгдөх дээд хэмжээнээс хэтэрчээ.
Өмнө нь мөн л Германы “Denkpharma-ийн үйлдвэрлэсэн Лозар – Денк, Колазар-Денк шахмал эмийн найрлагад орсон хорт бодисын хэмжээ зөвшөөрөгдөх хэмжээнээс хэтэрсэн тул уг бүтээгдэхүүнийг эмийн зах зээлээс эргүүлэн татаж байсан билээ. Манай улс мөн л хөнгөлттэй үнээр олгодог, зайлшгүй шаардлагатай эмийн жагсаалтад оруулчихсан. Даатгалаасаа хөнгөлж, хортой эмийг иргэдээ хэрэглэхийг төрийн бодлогоороо дэмжиж байх жишээтэй.
Эм гэдэг нэг талаас анагаах увдистай ч нөгөө талаас хор гэдгийг хүмүүс ойлгох хэрэгтэй. Иргэд нь хуурамч, чанаргүй эмийн талаар мэдээлэлгүйг далимдуулж Монгол улсын төр ч хуурамч эмийн зах зээлийг Эрүүл мэндийн даатгалаасаа дэмжиж санхүүжүүлдэг бусармаг байдлаа таслан зогсоогооч ээ!! Хорт хавдар, элдэв өвчин залуужаад байгаад энэ мэтээр хуурамч эм чинь нөлөөлөөд байгааг үгүйсгэх аргагүй.
Сэтгүүлч Б.Отгон
