Коронавирусээс үүдэн суругуль, цэцэрлэгийг ирэх 9-р сарын нэгэн хүртэл хичээллүүлэхгүй байх чиглэлийг Ерөнхий сайд гаргасан. Ингэвэл сургууль, цэцэрлэгүүд үндсэндээ нэг улирал л хичээллэсэн болж байна.
Гэвч хувийн сургууль, цэцэрлэгт сурдаг хүүхдүүдийн эцэг эхчүүдээс ихээхэн гомдол гарах болсон. Учир нь хувийн сургууль, цэцэрлэгүүд сургалтын төлбөрөө бүтэн жилээр нь авсан ч хөл, хорионоос үүдэн хичээл ороогүй, зарим нэг нь цахимаар хичээл заасан ч нэр төдий байгаа тул сургалтын төлбөрөө буцааж авах хүсэлтэй байгаа юм.
Тэгвэл Улсын онцгой комисс, Засгийн газар дээрх асуудалд зохицуулалт хийхээр ярьж эхэлжээ. Ингэхдээ хөл хорионоос хойш онлайн сургалт явуулаагүй хувийн их, дээд сургууль, цэцэрлэгийн төлбөрийг ирэх жилийн хичээлийн төлбөрт шилжүүлэхийг санал болгох аж. Уг шийдвэр Засгийн газрын дараагийн хурлаар бүрэн тодорхой болох юм байна.
Улсын хэмжээнд нийт 1017 цэцэрлэг үйл ажиллагаа явуулдаг аж. Үүнээс 303 нь хувийн эзэмшлийн цэцэрлэг. Харин 790 гаруй сургууль үйл ажиллагаа явуулдгаас 200 орчим нь мөн хувийн сургууль юм.
