Азий хөгждийн банкнаас манай улсын төрийн өмчит усжуулалтын систем болон хүнсний ногооны үйлдвэрлэлийг шинэчлэхэд зориулан 40 сая ам.долларын зээл олгохоор болжээ. Мөн Ядуурлыг бууруулах Японы сангаас 2 сая ам.долларын буцалтгүй тусламж үзүүлж байгаа аж. Уг гэрээнд гарын үсэг зуржээ.
Хөдөө аж ахуйн салбар нь орон нутагт иргэдийн амьжиргааны гол эх үүсвэр болдог ч нэр төрлийн хувьд хангалттай төрөлжөөгүйн улмаас хүнсний ногоо, бордооны хувьд Монгол Улс импортоос хамааралтай хэвээр байна. Үүний зэрэгцээ, улсын хэмжээнд усалгааны систем нь хүчин чадал багатай, ган гачиг, үер усны аюулд тэсвэргүй байдаг.
Тиймээс дээрх санхүүжилтийг үр ашигтай, уур амьсгалын өөрчлөлтөд тэсвэртэй усалгааны дэд бүтэц, менежментийн системийг нэвтрүүлэхад зарцуулна. Хөдөө аж ахуйн үйлдвэрлэлийн тогтвортой байдлыг дээшлүүлэх, улмаар техник, институци болон удирдлагын чадавхуудыг бэхжүүлэх, уялдаа холбоог сайжруулах юм байна.
Түүнчлэн төслийн хүрээнд эрс хүйтэрдэг бүс нутгуудад зориулсан үр ашиг өндөртэй усалгааны технологи, өвөл, зуны ногооны хүлэмж болоод алсын зайн тандалт хийх технологи бүхий хэрэглэхэд хялбар хөрөнгийн менежментийн систем зэрэг инновацид суурилсан, шинэлэг ажлуудыг хийхээр төлөвлөсөн байна.
ЯБЯС нь Япон Улсын Засгийн газрын санхүүжилттай бөгөөд Монгол Улсад сүүлийн 20 жил ядуурлыг бууруулах, амьжиргааг сайжруулах болон байгаль орчныг хамгаалах чиглэлээр төсөл, хөтөлбөрүүдийг санхүүжүүлж иржээ.
АХБ нь Ази, Номхон далайн бүс нутагт нэн ядуурлыг арилгах хүчин чармайлтаа үргэлжлүүлэхийн зэрэгцээ цэцэглэн хөгжсөн, хүртээмжтэй, тогтвортой, сөрөг нөлөөг даван туулах чадвартай бүс нутгийг цогцлоохын төлөө тууштай ажиллаж байна. Анх 1966 онд байгуулагдсан тус банкны нийт 68 гишүүн орны 49 нь тухайн бүс нутагт оршдог.
