Таван сайдын суудал, УИХ-ын даргын албан тушаалтай өг гэж Н.Учралыг шантаажилжээ

Ёстой юм ёсоороо л болж байна. Нэг л их Н.Учралыг Ерөнхий сайд болгочихвол бүх зүйл болчихно гэж байсан Д.Амарбаясгалан, Л.Оюун-Эрдэнийн талынхан дараагийн шантаажаа эхлүүлжээ. Дөнгөж өчигдөр үдэш Ерөнхий сайдаар томилогдсон МАН-ын дарга Н.Учралаас таван сайдын суудал дээр нэмэх нь УИХ-ын албан тушаалыг өг гэсэн “хүсэлт” барьж орсон байна. Хэрэв энэхүү шаардлагыг нь биелүүлэхгүй бол Засгийн газрын сайд нарыг нь тангараг өргүүлэхгүй гэсэн тулгалт маягийн зүйл хийсэн бололтой юм. Уг нь Үндсэн хуулийн нэмэлт, өөрчлөлтөөр Ерөнхий сайд нь танхимаа өөрөө бүрдүүлж, сайд нараа томилж, чөлөөлөх эрхтэй болсон. Гэвч сайд нарыг УИХ-д тангараг өргүүлнэ гэсэн хуулийн заалтаар шантаажилж таван сайдын суудал нэхэж байгаа юм байна. 

Намын эв нэгдлээ бодсон ч, гадаад орчинд өрнөж буй геополитикийн нөхцөл байдлаа харсан ч Ерөнхий сайдад цаг хугацаа юу юунаас чухал байгаа. Гэтэл ард түмний эрх ашиг биш, албан тушаалын наймаа л Д.Амарбаясгалан, Л.Оюун-Эрдэнийн талынханд чухал байгаа бололтой юм.

Бүр сайд нарын нэрсийг, УИХ-ын даргаар томилуулах хүнтэй нь хамт Ерөнхий сайдад өгсөн гэх мэдээлэл байна. Намын даргадаа Ерөнхий сайдын эрх мэдэлд нь халдаж, сайд нарын нэрсийг санал болгож болдог юм байж.

Гэтэл бүр давраад УИХ-ын онцгой бүрэн эрхэд халдаж, спикерийн суудлаар наймаалцахыг оролдож байгаа нь парламентынхаа зарчимд ч халдаж буй хэрэг. Эх сурвалжуудын мэдээлж буйгаар Д.Амарбаясгалан, Л.Оюун-Эрдэнийн талынхан Г.Занданшатарын Засгийн газарт Шадар сайдаар ажиллаж байхдаа Ерөнхий сайдыгаа огцруулах бичиг бариад гүйж байсан  С.Амарсайханыг УИХ-ын даргаар сонгох тулгалт хийж яваа аж.

МАН-ын гуравдугаар ээлжийнхэн ийнхүү хоорондоо зодолдох зуур иргэдийн амьдрал, ахуй ямар болтлоо дордож буйг хэн хүнгүй мэднэ. Өнгөрсөн намраас эхэлсэн Д.Амарбаясгалан, Л.Оюун-Эрдэнийн шантааж ямар боловч Г.Занданшатарын Засгийн газрыг хөмрөөд авсан. Одоо барьцаа ахиулж, шантаажаа лавшруулж шинэ Ерөнхий сайд Н.Учралаас таван сайдын суудал, УИХ-ын даргын албан тушаалтай нэхэж буй нь энэ. Яасан ч ханаж цаддаггүй хүсэл, шунал вэ!