Японы өрхийн хэрэглээний зардал дөрөв дэх сардаа дараалан буурч, цалин 1 хувь өсчээ

Япон Улсын Засгийн газраас өнөөдөр танилцуулсан эдийн засгийн тайлан мэдээллээр тус улсын өрхийн хэрэглээний зарцуулалт 2026 оны гуравдугаар сард өмнөх оны мөн үеэс 2.9 хувиар буурсан үзүүлэлттэй гарлаа. Энэ нь өрхийн зарцуулалт сүүлийн дөрвөн сар дараалан буурсан үзэгдэл болж байгаа бөгөөд хүнс, эрчим хүч болон хувцас хэрэглэлийн үнийн өсөлт иргэдийн худалдан авах чадварт шууд нөлөөлсөн гэж шинжээчид үзэж байна.

Хэдийгээр өрхийн зарцуулалт ийнхүү буурсан ч ажилчдын бодит цалингийн хэмжээ гуравдугаар сард 1.0 хувиар өссөн нь эдийн засагт эерэг болон сөрөг дохиог зэрэг өгч байгаа бөгөөд хэрэглээний сагс дахь бүтцийн өөрчлөлт гүнзгийрч байгааг илтгэв.

Иргэдийн өдөр тутмын амьдралын зардалд томоохон байр суурь эзэлдэг хүнсний бүтээгдэхүүн, цахилгаан, дулааны төлбөр болон хувцас хэрэглэлийн үнэ тасралтгүй нэмэгдэж байгаа нь өрхүүдийг зардлаа танахад хүргэж байгаа юм.

Японы дундаж цалинг Монгол Улсынхтай харьцуулахад тоон үзүүлэлтийн хувьд ихээхэн зөрүүтэй байна.

Японд нэг ажилтны сарын дундаж цалин ойролцоогоор 300-400 мянган иен буюу 6.5-9 сая төгрөгтэй тэнцэж байгаа нь Монгол Улсын дундаж цалингаас (ойролцоогоор 2.2-2.5 сая төгрөг) даруй 3-4 дахин өндөр үзүүлэлт юм.

Гэсэн хэдий ч Японы амьжиргааны өртөг, тэр дундаа түрээс, тээвэр, үйлчилгээний зардал өндөр тул бодит худалдан авах чадварын хувьд иргэдэд ирэх дарамт ижил түвшинд байна.

Нөгөөтэйгүүр, хөдөлмөрийн зах зээл дээрх бодит цалингийн хэмжээ гуравдугаар сард 1.0 хувиар өссөн нь сүүлийн гурван сар дараалан өсөлттэй гарсан эерэг үзүүлэлт боллоо. Гэвч цалингийн энэхүү өсөлт нь иргэдийн хэрэглээг идэвхжүүлэхэд хангалттай нөлөө үзүүлж чадахгүй байгааг мэргэжилтнүүд онцолж байна.

Учир нь Японы өрхүүд нэмэлт орлогоо чөлөөт хэрэглээнд зарцуулахын оронд эмнэлгийн тусламж үйлчилгээ, орон сууцны төлбөр зэрэг нэн шаардлагатай суурь хэрэгцээндээ түлхүү хуваарилж, ирээдүйн санхүүгийн эрсдэлээс сэргийлэн хэрэглээгээ хязгаарласан хэвээр байгаа юм.

Сангийн яамнаас гаргасан дөрөвдүгээр сарын эцсийн тайлангаар Японы гадаад валютын нөөц 1.17 их наяд ам.долларт хүрсэн байна. Өнгөрсөн дөрөвдүгээр сарын 30-ны өдөр иений ханшийг тогтворжуулах зорилгоор зах зээлд томоохон хэмжээний интервенц хийсэн гэх таамаглал байгаа хэдий ч гадаад валютын нөөцийн хэмжээнд төдийлөн их өөрчлөлт ороогүй нь ажиглагдлаа.

Хэдийгээр аж ахуйн нэгжүүдийн ашиг орлого өндөр, цалин нэмэх хэлэлцээрүүд амжилттай явагдаж байгаа ч Ойрхи Дорнодын мөргөлдөөн болон түүхий газрын тосны үнийн өсөлт зэрэг геополитикийн эрсдэлүүд эдийн засгийн өсөлтийн хурдыг сааруулж болзошгүйг анхаарууллаа.

Эх сурвалж: - marketscreener.com - nippon.com - youtube.com - businesstoday.com.my - english.news.cn