Венесуэльд хүчтэй хос газар хөдлөлт болж 235 хүн амь үрэгдэж, 4300 орчим хүн гэмтэж бэртэн, 40,000 орчим иргэн сураггүй болжээ
Венесуэл Улсад 2026 оны зургаадугаар сарын 24-ний орой дараалсан хоёр удаагийн хүчтэй газар хөдлөлт болж, улс орон даяар онц байдал зарлаад байна. Орон нутгийн цагаар 18:04 цагт эхэлсэн 7.2 болон 7.5 магнитудын хүчтэй "сейсмик дублет" буюу хос газар хөдлөлт ердөө 39 секундийн зайтай тохиож, түүхэн дэх хамгийн их хохирол учруулсан гамшгуудын нэг боллоо.
Одоогийн байдлаар албан ёсоор 235 хүн амь үрэгдэж, 4300 орчим хүн гэмтэж бэртсэн бол 40,000 орчим иргэн сураггүй болоод байгаа тул эрэн хайх, аврах ажиллагааг эрчимтэй үргэлжлүүлж байна.
АНУ-ын Геологийн албаны (USGS) мэдээлснээр, уг байгалийн гамшиг нь 1900 оноос хойш тус улсад тохиолдсон хамгийн хүчтэй газар хөдлөлтөд тооцогдож байна. Газар хөдлөлтийн голомт нь Яракуй мужийн Сан Фелипе болон Юмаре хотуудын ойролцоо, Боконо-Сан Себастьян-Эль Пилар хэмээх идэвхтэй хагарлын бүсэд 10-20 км-ийн гүнд байжээ.
Чичирхийлэл маш хүчтэй байсан тул хөрш зэргэлдээ Колумб улсын нийслэл Богота хотод хүртэл мэдрэгдсэн бөгөөд үндсэн чичирхийллээс хойш 30 гаруй удаагийн хүчтэй давтамж бүртгэгдээд байна.
Нийслэл Каракас болон Ла Гуайра, Миранда, Карабобо, Фалькон мужуудад хамгийн их сүйрэл дагуулав. Нийтдээ 100 гаруй барилга бүрэн нурж, 250 гаруй байгууламж хүнд гэмтсэн бөгөөд Каракасын метроны систем бүрэн зогссон байна.
Майкетиа дахь Симон Боливарын олон улсын нисэх онгоцны буудалд ихээхэн хохирол учирсан тул Испанийн "Iberia", "Air Europa" зэрэг агаарын тээврийн компаниуд нислэгээ тодорхойгүй хугацаагаар цуцалжээ. Дэд бүтцийн эвдрэлээс гадна эрүүл мэндийн салбар хүндхэн сорилттой тулгарч, 91 эмнэлэг газар хөдлөлтийн идэвхтэй бүсэд өртсөнөөс хэд хэдэн томоохон эмнэлгийг яаралтай нүүлгэн шилжүүлсэн байна.
Ерөнхийлөгчийн үүрэг гүйцэтгэгч Делси Родригез улс орон даяар гамшгийн байдал зарлаж, сэргээн босголтын ажилд зориулж 200 сая ам.долларын яаралтай тусламжийн сан байгуулснаа мэдэгдлээ.
Олон улсын хамтын нийгэмлэг ч тусламжийн гараа сунгаж эхэлсэн бөгөөд НҮБ болон Дэлхийн Зөн байгууллага гамшгийн багуудаа идэвхжүүлсэн байна. Бразил улс 36 гал сөнөөгч, явуулын эмнэлэг илгээсэн бол Мексик, Колумб, Испани, АНУ зэрэг орнууд аврах ажиллагаанд туслах санал ирүүлжээ.
Дэлхийн гамшгийн аюулын дохиолол, зохицуулалтын системээс (GDACS) "Улаан түвшин"-ий аюул зарлан ажиллаж байна.
Хэдийгээр аврах ажиллагаа эрчимтэй явагдаж байгаа ч АНУ-ын Геологийн албаны PAGER системээс гаргасан таамаглалаар амь үрэгдэгсдийн тоо цаашид 100,000-д хүрэх эрсдэлтэй байгааг анхаарууллаа. Одоогийн байдлаар Ла Гуайра мужийг гамшгийн бүсээр зарлаж, иргэдийг аюулгүй газарт нүүлгэн шилжүүлэх ажил үргэлжилж байна. Олон улсын тусламжийн цуваа хүрэлцэн ирснээр нуранги дороос амьд үлдсэн хүмүүсийг аврах найдвар нэмэгдэж байгаа ч дэд бүтцийн бүрэн сүйрэл нь сэргээн босголтын ажилд асар их хөрөнгө, хугацаа шаардагдахыг харуулж байна.
Эх сурвалж:
• wvi.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.
Одоогоор сэтгэгдэл байхгүй байна. Та анхны сэтгэгдлийг бичээрэй.