Татвар төлөгчдийн 26 тэрбум төгрөг ганцхан шөнийн бороонд урслаа

Сэлбэ голын голдирлыг сайжруулах, үерийн эрсдэлээс хамгаалах зорилгоор 2021 оны их үерийн дараа нийт 26 тэрбум төгрөгийн төсөвт өртөг бүхий томоохон бүтээн байгуулалтын ажил эхэлсэн билээ.

Санхүүжилтийн бүтцийг авч үзвэл, нийт хөрөнгө оруулалтын дийлэнх хэсэг буюу 19.5 тэрбум төгрөгийг үерийн далан сувгийг хүчитгэх, инженерийн байгууламж барихад төлөвлөсөн бол үлдсэн 6.2 тэрбум төгрөгийг иргэдийн амралт, чөлөөт цагаа өнгөрүүлэх орчны тохижилт, ногоон байгууламжид зарцуулахаар тусгасан байна. Гэвч саяхны орсон зуны эхний бороо уг бүтээн байгуулалтын "чанар" болон гүйцэтгэлийг бодит байдал дээр хатуухан шалгалаа. Голын усны түвшин ялимгүй нэмэгдэхэд л тохижилтын ажилд ашигласан хайрга, чулуун дүүргэлтүүд урсаж, явган хүний зам, шат болон бусад байгууламжууд нурж эхэлсэн нь олон нийтийн анхаарлыг татаж байна.

Инженерийн нарийн тооцоололгүй, технологийн горим алдагдсан байж болзошгүй эдгээр эвдрэлүүд нь уг төсөл анхнаасаа чанарын шаардлага хангаагүй, хэт хэврэг хийгдсэнийг бэлхнээ гэрчилж байна. Олон нийтийн сүлжээгээр иргэд 26 тэрбум төгрөгийн хөрөнгө оруулалт хэр үр дүнтэй байсанд туйлын шүүмжлэлтэй хандаж, хариуцлагын асуудлыг хөндөж эхэллээ. Албан ёсны нээлтээ ч хийж амжаагүй байхад байгалийн давагдашгүй хүчин зүйл биш, ердийн хэмжээний хур тунадасыг ч тэсвэрлэж чадахгүй байгаа нь татвар төлөгчдийн мөнгийг салхинд хийсгэсэн хэрэг болж байна.

 Иргэдийн зүгээс энэхүү төслийг хэрэгжүүлсэн гүйцэтгэгч компаниуд болон хяналт тавьсан холбогдох албан тушаалтнуудаас тайлбар, хариуцлага нэхэж байна. Цаашид зуны их бороо, үерийн оргил үе тохиоход энэхүү байгууламж Сэлбэ голын дагуух айл өрх, аж ахуйн нэгжүүдийг хамгаалж чадах эсэх нь эргэлзээтэй боллоо. Хэрэв эхний борооноор ийм хэмжээний хохирол амсаж байгаа бол илүү их хэмжээний үер буух үед далангийн аюулгүй байдал алдагдаж, эрсдэл дагуулах аюул нүүрлэж байна. Тиймээс уг бүтээн байгуулалтад мэргэжлийн хяналт шалгалт дахин оруулж, дутуу дулимаг гүйцэтгэлийг яаралтай засах шаардлага тулгарч байна.