Өлгийтэй хүүгээс дэлхийн аваргын өрсөлдөгч хүртэл: Месси ба Ямалын галзуу хувь төөрөг

Факт 1: 19 жилийн өмнө 20 настай залуу Лионель Месси хандивын аянд зориулж 5 сартай нялх Ламин Ямалыг усанд оруулж, тэвэрч зургаа авахуулж байв. Тэгвэл одоо 39 настай амьд домог Месси өөрийн сүүлчийн дэлхийн аваргадаа, өнөөх өлгийтэй байсан 19 настай шинэ цагийн гайхамшиг Ямалын эсрэг дэлхийн хамгийн том тайзан дээр нүүр тулж байна. Энэ бол хөлбөмбөгийн түүхэн дэх хамгийн галзуу "Үе солигдох" мөч юм.

Факт 2: Энэ бол зүгээр ч нэг финал биш! Түүхэнд анх удаа хамгийн сүүлийн Европын аварга болон Копа Америкагийн аварга  багууд дэлхийн аваргын алтан дагинын төлөө шууд шалгарч үлдсэн нь энэ юм. Энэ нь Латин Америкийн шавхагдашгүй хүсэл тэмүүлэл, Европын төгс тактикийн жинхэнэ тулаан байх болно.

Факт 3: Тэд хэдий агуу түүхтэй ч ДАШТ-д өмнө нь ганцхан удаа  таарч, Аргентин хожиж байжээ. Харин бүх цаг үеийн түүхэнд тэд 14 удаа нүүр тулахад тус бүр 6 хожиж, 2 тэнцсэн гэх "Яг тэнцүү" үзүүлэлттэй байна. Хамгийн сүүлд 2018 онд Испаничууд Аргентиныг 6:1-ээр хайр найргүй бут ниргэж байв. Гэхдээ тэр үед Месси талбайд гараагүй байсан бөгөөд энэ удаа Аргентинчууд өшөөгөө авахаар ирлээ.

Факт 4: Аргентин дэлхийн аваргын финалд 7 дахь удаагаа шалгаран үлдэж байна. Хэрэв тэд хожвол 4 дэх цомоо  өргөж, Герман болон Италийн амжилттай зэрэгцэх түүхэн боломж бүрдэнэ. Харин Испаничууд түүхэндээ ердөө 2 дахь удаагаа финалд үлдэж байгаа нь энэ бөгөөд тэдний 2010 оны алдарт "Тики-така" үеийн алтан амжилтыг шинэ үеийнхэн нь давтахыг зорьж байна.

Факт 5: Испаничууд 37 тоглолт дараалан ялагдаагүй гэх гайхамшигт дэлхийн рекордыг давтаад байна. Сонирхолтой нь, үүний өмнө Аргентин улс 2019-2022 онд 36 тоглолт дараалан ялагдаагүй байсан юм. Хэрвээ Испани энэ эрчээрээ цом өргөвөл ДАШТ-ий түүхэнд хамгийн бага гоол алдсан аварга болж магадгүй. Харин тэдний хана хэрэм мэт хамгаалалтыг эвдэх түлхүүр нь Аргентины довтолгоонд бий юу?

Факт 6: АНУ-д зохиогдож буй энэхүү финалын тасалбарын дундаж үнэ 11,300 доллар (ойролцоогоор 38 сая төгрөг) давжээ! Энэ нь зөвхөн хөлбөмбөг төдийгүй АНУ-ын бүх спортын түүхэн дэх хамгийн үнэтэй, хамгийн их эрэлттэй арга хэмжээ болж рекордыг эвдлээ. 80 мянга гаруй үзэгчдийн өмнө жинхэнэ мөнгө, нэр төр, түүх бүтээх тоглолт эхлэхэд бэлэн болоод байна!