С.Шаарийбуу: Монголын ард түмэн, Монгол төрийн өмнө "уучлаарай" гэдэг ганцхан үгийг л хэлүүлэх гэж би өнөөдрийг хүртэл явж байна

Охин минь авч өгсөн энэхүү хослолыг би 20 жилийн турш өмсөж байна. Амьдралын хатуу хүтүүг туулж явахад ийм л зүйл тохиолддог юм байна. Миний охин энэ хэргийн улмаас харамсалтайгаар амиа алдсан бөгөөд түүний хоёр хүү үлдсэнээс нэг нь 15 насандаа бурхан болсон. Бага хүү нь хоёр настай үлдэхэд би "ээж нь ирүүллээ" хэмээн баяр болгоноор хуурамч бэлэг өгч, 12 жилийн турш хуурч ирлээ.

Энэхүү хэргийн үнэн мөнийг тогтоохын тулд би Малайз улс руу 18-19 удаа явж, шүүх хуралд мэдүүлэг өгүүлэхээр 76 гэрчийг хоёр удаа авч очсон. Одоо ирэх 10 дугаар сарын 27-ны өдөр болох шүүх хурал бол миний хувьд хамгийн сүүлчийн боломж, хамгийн ач холбогдолтой мөч юм.

Хэрэв энэ удаад л алдах юм бол дахин заргалдах эрхгүй болж, сүүлийн 20 жилийн хөдөлмөр талаар өнгөрөх гээд байна. 

Үүгээр бүх зүйл дуусна, дахин өргөдөл бичих, заргалдах газар үлдэхгүй. Гэм буруутай этгээдүүд ялыг нь эдлэх ёстой. Захиалагч нар ямар нэгэн хэмжээгээр буруугаа хүлээх учиртай.

Миний бие хэн нэгнээс хариу авч, өшөө хонзон санахыг урьтал болгоогүй. Хамгийн гол нь Монголын ард түмэн, Монгол төрийн өмнө "уучлаарай" гэдэг ганцхан үгийг л хэлүүлэх гэж би өнөөдрийг хүртэл явж ирсэн.

УИХ-ын гишүүн П.Номинчимэг Танзани улсад болох Олон улсын парламентын холбооны хуралд оролцох үеэрээ Австралийн парламентын дарга болон Малайзын парламентын төлөөлөгчидтэй уулзахаар төлөвлөж байна. Энэ хүрээнд УИХ-ын даргаас албан ёсны бичиг илгээж, Монгол Улсын иргэний асуудалд анхаарал хандуулж, ач холбогдол өгөхийг хүссэн чиглэл өгч явуулахаар боллоо.

Мөн УИХ-ын гишүүн Г.Үүрийнтуяа Бээжин дэх Монгол Улсын Элчин сайдтай уулзаж, энэ асуудлаар хамтран ажиллахаар болсон байна. Ирэх 10 дугаар сарын 27-нд болох шүүх хуралд оролцоход төр засгаас тодорхой дэмжлэг үзүүлэхээр болсонд талархаж байна. Би өөрийн зүгээс бүхий л боломжоороо хичээх болно. Баярлалаа.