Тав хоногийн өмнө буюу энэ сарын 23-ны 23:10 минутын орчимд Сэлэнгэ аймгийн Баянгол сум, Нарангийн ам гэх газар үйл ажиллагаа явуулдаг “Пентатерра” ХХК-ийн туслан гүйцэтгэгч “Шарын гол уул уурхай” ХХК-ийн талбайд осол гарч, нэгэн иргэн авто машинтайгаа уурхайн ухаш руу унасан хэрэг гарсан юм.
Хэрэг гарснаас хойш осолдсон иргэнийг эрэн хайх ажиллагааг Сэлэнгэ аймгийн Онцгой байдал, Мэргэжлийн хяналтын газрынхан тасралтгүй тав хоног зохион байгуулж ажиллаж байна.
Ослын газарт Сэлэнгэ аймгийн Мэргэжлийн хяналтын газрын дарга Ж.Отгонхүүгээр ахлуулсан улсын байцаагчид, Сэлэнгэ аймгийн Онцгой байдлын газрын дарга, хурандаа Г.Баатараар ахлуулсан 10 аврагч, нэмэлтээр Дархан-Уул аймгийн аврах ангиас 10 аврагч, Мандал сум дахь Цагдаагийн хэлтэс, Баянгол сумын ЗДТГ, Мандал сум дахь сум дундын Прокурорын газрын албан хаагчид ажиллаж байна.
