Дорнод бүсэд сүүлийн жилүүдэд газрын тос тэргүүтэй уул уурхайн олборлолт эрчимтэй хөгжиж байгаагаас цахилгаан эрчим хүчний хэрэглээ өсч, өнөөдөр Дорнодын цахилгаан станц бүрэн хүчин чадлаараа ажилласан ч өсөн нэмэгдэж буй хэрэгцээг хангаж чадахгүйд хүрчээ.
Тиймээс Чойбалсангийн цахилгаан станцыг 50 мегаваттаар нэмэгдүүлэх өргөтгөлийн ажлыг эхлүүлээ.
Дорнодын цахилгаан станцын хүчин чадлыг нэмэх асуудал сүүлийн 10 жил яригдаж, хэд хэдэн Засгийн газар дамжсан ч ажил хэрэг болоогүй. Тиймээс газрын тосны олборлолт болон уул уурхайг тогтвортой хөгжүүлэх, зүүн бүсэд төлөвлөж буй бүтээн байгуулалтуудыг хийхийн тулд Чойбалсан дахь станцыг өргөтгөж, хүчин чадлыг нэмэгдүүлэх ажлыг ийн эхлүүлж байгаа бөгөөд бүтээн байгуулалтыг 18 сарын хугацаанд хийхээр төлөвлөжээ.
Цахилгаан станцын хүчин чадлыг нэмэгдүүлэн өргөтгөснөөр газрын тосны олборлолт нэмэгдэж, уул уурхайн бүтээгдэхүүнээ дотооддоо боловсруулахад хувь нэмрээ оруулна гэж үзэж байна.
