АЙЛЧЛАЛ: “Чингис хаан” олон улсын нисэх онгоцны буудлыг өргөтгөх хүрээнд хийгдэж буй судалгааны ажлыг эрчимжүүлэхээр хэлэлцлээ

Монгол Улсын Засгийн газрын гишүүн, Зам, тээврийн сайд Б.Дэлгэрсайханы Япон Улсын Токио хотод хийх албан айлчлал үргэлжилж байна. Тэрээр Япон Улсын Гадаад хэргийн яамны урилгаар 2026 оны 02 дугаар сарын 02-ноос энэ сарын 08-ны өдрийг дуустал “Сайд нарт зориулсан айлчлалын хөтөлбөр” буюу “Практик түвшний стратегийн солилцооны хөтөлбөр”-т хамрагдаж байна.

Айлчлалын хүрээнд Зам, тээврийн сайд Б.Дэлгэрсайхан Япон Улсын “Ориентал Консалтантс Глобаль” ХХК-ийн байранд зочилж, Ерөнхийлөгч Ёнэзава Эйжи тэргүүтэй төлөөлөгчидтэй уулзжээ.

Талууд уулзалтаар “Чингис хаан” олон улсын нисэх онгоцны буудлыг өргөтгөх, хүчин чадлыг нэмэгдүүлэх хүрээнд хийгдэж буй судалгааны ажлыг эрчимжүүлэх, бүтээн байгуулалтын ажлыг эрт эхлүүлэх тухай өргөн хүрээтэй хэлэлцлээ.

Япон улсын “Ориентал Консалтантс Глобаль” компанийн хувьд, Монгол Улсад “Чингис хаан” нисэх онгоцны буудлыг анх барихад техник, эдийн засгийн урьдчилсан судалгаа буюу ТЭЗҮ-г хийж, зураг төслийг нь боловсруулсан зөвлөх компани юм. Тус компани энэ удаа мөн Япон Улсын Олон улсын хамтын ажиллагааны байгууллага ЖАЙКА-тай хамтран шинэ нисэх буудлын өргөтгөлийг барих зураг төслийг боловсруулж, ТЭЗҮ судалгааг хийж байгаа билээ.

 

Уулзалтаар Япон талаас бэлтгэл ажлын хүрээнд хийж буй судалгааны ажлын явцыг танилцуулж, цаг үеийн мэдээллүүдийг солилцлоо. Япон Улсын “Ориентал Консалтантс Глобаль” компанийн Нисэх буудлын хэлтсийн дарга, “Чингис хаан” нисэх онгоцны буудлын өргөтгөлийн төслийн менежер Такахаши Коичи судалгааны ажлын хүрээнд гаргасан урьдчилсан зураг төслийг танилцуулаад, төслийн судалгааг ирэх сард эцэслэж, Зам, тээврийн сайд Б.Дэлгэрсайханд сүүлийн байдлаар танилцуулна гэдгээ хэллээ.

Зам, тээврийн сайдын зүгээс Монгол Улсын агаарын тээврийн салбарт зорчигч тээврийн урсгал эрчимтэй нэмэгдэж байгааг онцлоод, “Чингис хаан” нисэх буудлыг өргөтгөх, хүчин чадлыг нэмэгдүүлэх ажлыг Монгол Япон хоёр улсын Засгийн газрын тохиролцсон зээлийн хэмжээнд багтаан барих, мөн төлөвлөснөөс ч илүү богино хугацаанд төслийг хэрэгжүүлэх шаардлагатай байгааг онцоллоо. Мөн төслийн бүтээн байгуулалтын ажлыг эрт эхлэх, төлөвлөсөн хугацааг богиносгох үүднээс барилгын төлөвлөлт, судалгааны ажлыг 2039 оноор тооцоолон хийж, ажлаа эрчимжүүлэхийг хүслээ.

Төсөлд тусгаснаар нисэх буудлыг өргөтгөх барилгын ажлыг 2028 онд эхлүүлж, 2034 онд дуусгахаар төлөвлөж буйг төслийн багийнхан хэлж буй юм.

Талууд энэхүү уулзалтаар төслийн барилгын ажлыг хөнгөлөлттэй зээлийн үнийн дүнд багтаан барих, зардлыг бууруулах хүрээнд төлөвлөлтийг хэрхэн хийх тухай харилцан санал солилцож, зардлыг бууруулж болох хэд хэдэн хувилбаруудыг хэлэлцэж тогтлоо. Мөн дэд бүтцийн салбарт цаашид хамтран ажиллах боломжуудын тухай хэлэлцлээ.

Уулзалтын төгсгөлд, “Ориентал Консалтантс Глобаль” ХХК-ийн Ерөнхийлөгч (CEO, President) Ёнэзава Эйжи Зам, тээврийн сайд Б.Дэлгэрсайханд төслийн хэрэгжилтийг дэмжин ажиллаж, тулгамдаж буй асуудлуудын талаар нээлттэй санал солилцож буйд талархал илэрхийллээ.

Мөн төслийн бүтээн байгуулалтын ажлыг эрт эхлэх, төлөвлөсөн хугацааг богиносгох хүрээнд бэлтгэл ажлаа улам эрчимжүүлэн ажиллах болно гэлээ. Ерөнхийлөгч Ёнэзава Эйжигийн зүгээс бүтээн байгуулалтын ажлыг эрт эхлэхийн тулд зээлийн гэрээг яаравчлах, бэлтгэл ажлын хүрээнд газар чөлөөлөлтийн асуудлыг цэгцлэх буюу одоо байгаа карго терминалыг буулгах хэрэгтэй гэсэн саналыг хэлж, салбарын сайдын зүгээс анхаарал хандуулан ажиллаж өгөхийг хүслээ. Уулзалтад Зам, тээврийн сайд Б.Дэлгэрсайхан болон Монгол Улсаас Япон Улсад суугаа Онц бөгөөд Бүрэн Эрхт Элчин сайд Б.Баярсайхан, Япон Улсад суугаа Элчин сайдын яамны зөвлөх Ө.Мөнхбат, холбогдох албаныхан оролцлоо.

Япон Улсын “Ориентал Консалтантс Глобаль” компанийн зүгээс Ерөнхийлөгч (CEO, President) Ёнэзава Эйжи, Борлуулалт болон бизнес хөгжлийн хэлтсийн дарга (COO, Business Development) Кондо Казүясү, Төмөр замын тээврийн хэлтсийн дэд дарга (Railway Division Deputy Director) Йингйонграттанакул Наренторн, Нисэх буудлын хэлтсийн дарга, “Чингис хаан” нисэх онгоцны буудлын өргөтгөлийн төслийн менежер (Chief Consultant of Airport Department) Такахаши Коичи,Нисэх буудлын хэлтсийн – үнийн тооцоолол санхүүгийн мэргэжилтэн (Cost Specialist of Airport Department) Мацумүра Акихико, Төмөр замын хэлтсийн ахлах инженер Б.Доржханд нар оролцлоо.