Д.Амарбаясгалан: Уул уурхай, газрын хэвлийн баялгаас иргэдийн нэрийн дансанд орж ирэх ёстой мөнгийг ЗГ өмнөөс нь шанагадах гэж байна!
Монгол Улсын Ерөнхий сайд Н.Учрал 2027 онд хийж, хэрэгжүүлэх 9 шийдвэр танилцуулсан. Үүний дунд Оюутолгойгоос авах ногдол ашгийг ард түмэнд хүртээх тухай бий. Тэгвэл сөрөг хүчин болох АН-ынхан энэ 9 шийдвэр нь огт хэрэгжих боломжгүй, есөн шид нь бүрдсэн шийдвэр хэмээн шүүмжиллээ.
АН-ын БЕЗ-ийн дарга Д.Амарбаясгалан:
-Ерөнхийд нь дүгнэж хэлэхэд, энэ бол бодит шийдвэр биш юм. Уул уурхай, газрын хэвлийн баялгаас иргэдийн нэрийн дансанд төвлөрөх ёстой хөрөнгийг ард түмний нэрээр халхавчлан, явцуу эрх ашгийн үүднээс урьдчилан "шанагадах" гэсэн оролдлого гэж бид харж байна.
Тодруулбал, төсвийн тухай хуулийг дагалдуулан өргөн мэдүүлсэн "Нийгмийн болон дэд бүтцийн тулгамдсан асуудлыг шийдвэрлэх тухай" гэх ганцхан хуудас хуулийн төслөөр Баялгийн сангийн хөрөнгийг зарцуулахаар тусгажээ.
Хуримтлалын сангаар дамжин иргэдийн нэрийн дансанд орох ёстой мөнгөнөөс эхний ээлжинд 2 их наяд төгрөгийг нь урьдчилан "шанагадах" бол үлдсэн 1 их наядыг нь орж ирэнгүүт нь халбагадах гэж байна, гэссэн юм.
УИХ-ын гишүүн Ө.Шижир: 2020-2027 оныг хүртэлх төсөв 208 их наяд 839 тэрбум төгрөг
-Сүүлийн 10 жилд Монгол орон мөнгөгүй биш мөнгөтэйн зовлонд нэрвэгдсэн. Харамсалтай нь мөнгөө буруу зарсан, эрэмбэ дарааллыг буруу өрсөн. Саяхан 2025 МАН 11 мега төсөл ярьсан, дараа нь 24 мега төсөл ярьсан.
Сүүлийн 12 жилийн хугацаанд улсын төсвийн зарлага 10 дахин өссөн. Гэвч иргэдийн худалдан авах чадвар 10 дахин нэмэгдээгүй. Тэгэхээр Засгийн газар төсвөө буруу тооцоолж байна гэсэн үг. Хоёрхон жилийн дотор 7 удаа төсөв хэлэлцэж байна. Энэ төсвөө дандаа буруу тооцоолж байгаа үзүүлэлт.
Харин төрийн өмчийн компанийн ногдол ашгийг Үндэсний баялгийн санд хуримтлуулж байгаад , аривжаад өсөөд, илүү гарвал тодорхой хувийг төсөв рүү оруулах гэж Монгол Улс Үндэсний баялгийн сантай болсон.
Мөн Баялагийн сангийн тухай хуулиа маш ноцтой зөрчих гэж байна. Оюутолгойгоос орж ирээгүй байгаа 3 их наяд төгрөг ард түмэнд очих ёстой мөнгө. Ямар нэгэн дарга өмнүүр нь орж ирээд станци, дэд бүтэц барих боломжгүй. Гэтэл тэд орж ирээгүй мөнгийг иргэд ийн өмнөөс татаж авч улсын төсөвт оруулах гэж байна. Баялагийн сангийн хуулийг ингэж авах эрх байхгүй!
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.
Одоогоор сэтгэгдэл байхгүй байна. Та анхны сэтгэгдлийг бичээрэй.