Өмнөд Солонгосын прокурор Ерөнхийлөгч асан Юн Сок Ёлд цаазын ял оноох хүсэлтийг шүүхэд гаргалаа
Өмнөд Солонгосын прокурорууд 2024 онд цэргийн онц байдал тогтоох оролдлого нь бүтэлгүйтсэнтэй холбогдуулан огцорсон Ерөнхийлөгч Юн Сок Ёлд цаазын ял оноох хүсэлтийг шүүхэд гаргажээ.
Тусгай прокурор Чо Ын Согийн баг мягмар гарагт Сөүл хотын Төв дүүргийн шүүхэд хүсэлт гаргахдаа Юныг “өөрийнхөө хийсэн төрийн эргэлт” буюу self-coup-оор дамжуулан “либерал ардчилсан Үндсэн хуулийн дэг журмыг заналхийлсэн” гэж буруутгажээ
Прокурорууд:
“Энэ хэрэгт гарсан бослогын хамгийн том хохирогчид бол энэ улсын ард иргэд юм. Ял оноохдоо хөнгөрүүлэх ямар ч нөхцөл байхгүй, харин ч хатуу шийтгэл ногдуулах ёстой” хэмээн мэдэгдсэн байна.
Юн 2024 оны арванхоёрдугаар сард цэргийн онц байдал зарласнаар Өмнөд Солонгосыг улс төрийн гүн хямралд оруулсан бөгөөд үүний дараа эсэргүүцэгчид болон хууль тогтоогчид парламентад цугларч, уг арга хэмжээг эсэргүүцэн санал хураалт явуулж, хүчингүй болгосон юм.
Тус зарлигийг Дээд шүүх Үндсэн хууль зөрчсөн гэж шууд үзсэн бөгөөд улмаар Юн импичментэд орж, албан тушаалаасаа огцорч, шоронд хоригдсон. Цэргийн онц байдал зарласантай холбоотойгоор төрийн эсрэг бослого, эрх мэдлээ хэтрүүлэн ашигласан болон бусад гэмт хэрэгт буруутгагдсан Юны эрүүгийн шүүх хурал мягмар гарагт 11 цаг үргэлжилсний эцэст дууссан байна.
Шүүхийн эцсийн шийдвэрийг хоёрдугаар сарын 19-нд гаргана гэж Yonhap агентлаг мэдээлжээ.
Хуучин ерөнхийлөгч Юн өөрт нь тулгасан бүх хэргийг няцааж, сөрөг хүчний намуудын төрийн ажлыг гацаасанд хариу болгон өөрийн бүрэн эрхийн хүрээнд цэргийн онц байдал зарласан гэж тайлбарласан байна.
Тэрбээр мягмар гарагт шүүх дээр үг хэлэхдээ бослоготой холбоотой мөрдөн шалгалтыг “галзуурсан мэт”, “зохиомол”, “үнэнг гуйвуулсан” хэмээн шүүмжилжээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.
Одоогоор сэтгэгдэл байхгүй байна. Та анхны сэтгэгдлийг бичээрэй.