Үйл ажиллагаа нь таалагддаг улстөрчдийг Ерөнхийлөгч У.Хүрэлсүх тэргүүлжээ

MEC судалгааны төвийн "Улстөрийн барометр" судалгаагаа шинэчлэн гаргажээ. Судалгаагаар үйл ажиллагаа нь хамгийн их таалагддаг улстөрчийг Монгол Улсын Ерөнхийлөгч У.Хүрэлсүх 26%-аар тэргүүлжээ. Түүний талаарх улстөрийн эерэг үнэлгээ өмнөх улирлаас 1%-аар өссөн үзүүлэлттэй байна.

Ерөнхийлөгч У.Хүрэлсүхийн араас 17%-ийн саналаар УИХ-ын дарга Н.Учрал, 16%-ийн саналаар Ерөнхий сайд Г.Занданшатар оржээ. Харин сөрөг хүчний намаас АН-ын дарга О.Цогтгэрэл 14%-ийн саналаар 4-р байрт бичигдсэн бол УИХ-ын гишүүн Ө.Шижир өмнөх улирлаас 3 онооны өсөлттэй буюу 9%-аар 5-р байрт орж, Хотын дарга Х.Нямбаатар 1 онооны өсөлтөөр түүнтэй тэнцжээ.

"Үйл ажиллагаа нь хамгийн их таалагддаггүй" улс төрчид буюу рейтинг нь хамгийн их унаж яваа улстөрчдийг УИХ-ын дарга асан Д.Амарбаясгалан -21%-аар тэргүүлсэн бол түүний дараа Сангийн сайд Б.Жавхлан, Эрчим хүчний сайд Б.Чойжилсүрэн нар -20%-ийн саналаар удаалсан байна.

Харин 3-рт Боловсрол, шинжлэх ухааны сайд П.Наранбаяр -19%-аар рейтинг нь унаж яваа бол УИХ-ын дарга Н.Учрал, Ерөнхий сайд Г.Занданшатар, АҮЭБ-ын сайд Г.Дамдинням нар ч мөн үйл ажиллагаа нь таалагддаггүй улстөрчдийн жагсаалтад -15%-ийн саналаар тус тус бичигджээ.

Өмнөх Ерөнхий сайд асан Л.Оюун-Эрдэнэ Үйл ажиллагаа нь таалагддаг улстөрчдийн дотор хэвээр байгаа бөгөөд түүний хувьд өмнөх улирлаас -4 онооны бууралттай буюу 10%-ийн санал авчээ.