Лионель Месси эцгийнхээ дурсгалд зориулж хөлбөмбөгийн замналаа өндөрлүүлэх талаар цухуйлгав
Дэлхийн хөлбөмбөгийн амьд домог Лионель Месси өөрийн эцэг Хорхе Мессиг таалал төгссөний дараа мэргэжлийн спортын замналаа эрт өндөрлүүлэх тухайгаа цахим хуудаснаа мэдэгдлээ. Түүний аав Хорхе Месси 68 насандаа хүнд өвчний улмаас наймдугаар сарын 7-ны өдөр таалал төгссөн бөгөөд энэ нь супер одын ирээдүйн шийдвэрт хүчтэй нөлөөлжээ.
Аргентин Улсад болсон оршуулгын ёслолын дараа АНУ-д эргэн ирсэн Месси наймдугаар сарын 12-ны өдөр өөрийн Инстаграм хуудсаар дамжуулан сэтгэл хөдөлгөм нээлттэй захидал нийтэлж, цаашид талбайд гарах хүсэл эрмэлзэл нь эргэлзээтэй байгааг илэрхийлжээ.
Мессигийн нийтэлсэн захидалд түүний гүн гүнзгий уй гашуу болон аавгүйгээр хөлбөмбөг тоглох утга учрын талаарх эргэлзээ тод харагдаж байв.
Өдгөө 39 настай тэрээр "танигүйгээр юу хийхээ, хэрхэн үргэлжлүүлэхээ мэдэхгүй байна. Би зөвхөн хөлбөмбөг л тоглодог байсан бол одоо үүнийг удаан үргэлжлүүлэх эсэхдээ ноцтой эргэлзэж байна" хэмээн бичжээ.
Энэхүү мэдэгдэл нь түүний сая сая хөгжөөн дэмжигчдийн дунд зодог тайлах цаг нь болсон уу гэх айдсыг төрүүлээд байна.
Захидлын өөр нэгэн сэтгэл өвтгөм хэсэг нь 2026 оны Хөлбөмбөгийн ДАШТ-тэй холбоотой байлаа. Хорхе Мессигийн биеийн байдал муудсаны улмаас тэрээр долоодугаар сард болсон Испанийн эсрэг шигшээ тоглолтыг үзэж чадаагүй юм. Аргентины шигшээ баг тус тоглолтод 1-0 харьцаатай ялагдал хүлээсэн бөгөөд Месси эцгийнхээ төлөө түрүүлэхийг туйлын их хүсэж байснаа дурджээ.
Тэрээр аавдаа хандан "Би таныг ирж үзэж чадах байх гэж найдаад, шигшээ тоглолтод явна гэж байнга хэлдэг байсан. Би танд цом авчирч үзүүлэхийг маш их хүссэн" хэмээн харамсан өгүүлсэн байна.
Тэмцээний үеэрх бие махбодийн ачаалал болон насны онцлог нь түүний тоглолтод нөлөөлж эхэлснийг Месси хүлээн зөвшөөрчээ. Испанийн эсрэг шигшээ тоглолтод тэрээр өөрийн биеийн бүхий л нөөц бололцоогоо шавхсан ч хөл нь дийлээгүйг дурджээ.
"Би чадаагүй, хөл минь зүгээр л таг болчихсон. Энэ удаад би биеийнхээ хязгаарыг давж хичээсэн ч болсонгүй. Би хэзээ ч ингэж мэдэрч байсангүй" гэсэн нь түүнийг зодог тайлах бодит шалтгаануудын нэг болж байна.
Одоогоор Месси АНУ-ын "Интер Майами" багтай 2028 оны улирал дуустал гэрээтэй байгаа хэдий ч ойрын хугацаанд талбайд гарахгүй нь тодорхой болоод байна. Тэрээр гэр бүлийнхээ хамт гашуудлаа хуваалцахаар "Монтеррей" багийн эсрэг хийх тоглолтыг өнжөөд байгаа юм. Аргентины Хөлбөмбөгийн Холбооны ерөнхийлөгч Клаудио Тапиа энэ талаар хэлэхдээ, "холбооны зүгээс Мессиг шахахгүй бөгөөд түүнд хөлбөмбөгөөс таашаал авах боломжийг олгож, эцсийн шийдвэрийг өөрт нь үлдээнэ" гэж мэдэгджээ.
Лионель Мессиг ийм хүнд үеийг туулж байхад түүний олон жилийн өрсөлдөгч Криштиану Роналду олон нийтийн сүлжээгээр дамжуулан эмгэнэл илэрхийлсэн байна.
Хэдийгээр албан ёсны зодог тайлах мэдэгдэл хараахан гараагүй байгаа ч, түүний эцгийнхээ араас илгээсэн захидал нь хөлбөмбөгийн түүхэн дэх нэгэн агуу эрин үе төгсөхөд ойрхон байгааг илтгэж байна. Дэлхийн хөлбөмбөгийн ертөнц одоо түүний дараагийн алхмыг амьсгаа даран хүлээж байна.
Мессигийн цахим хуудаснаа бичсэн нийтлэл:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.
Одоогоор сэтгэгдэл байхгүй байна. Та анхны сэтгэгдлийг бичээрэй.